नेकपा प्रदेश ३ को संगठन विभाग प्रमुखमा अनन्त पौडेल चयन
हेटाैँडा । नेपाल कम्युनिष्ट पार्टी (नेकपा) प्रदेश नंबर ३ को संगठन विभाग प्रमुखमा नेकपा मकवानपुरका नेता तथा संविधानसभा सदस्य समेत रहिसकेका अनन्त पौडेल चयन भएका छन् । नेकपाको विहीवार बसेको प्रदेशको वैठकले मकवानपुरे नेता पौडेललाई प्रदेश नम्बर ३ को संगठन विभागको प्रमुख तथा प्रदेश सचिवालय सदस्यकाे जिम्मेवारी दिएको हो ।
तत्कालिन नेकपा एमालेका नारायणी अञ्चल कमिटि सचिव समेत रहेका पौडेल महत्वपूर्ण विभागको रुपमा रहेको संगठन विभागको जिम्मेवारी दिइएपछि निरन्तर न्यूजसँग प्रतिक्रिया दिदै पार्टीले दिएकाे जिम्मेवारीलाई नीति तथा विधी अनुरुप जिम्मेवारी वहन गर्ने बताए ।
प्रदेश अध्यक्ष नारायण दाहालको अध्यक्षता अष्टलक्ष्मी शाक्यको प्रमुख आतिथ्यतामा बसेको बैठकले प्रदेश सचिवालयमा पाैडेल सहित मकवानपुरका ६ जना नेतालाई चयन गरेको छ ।
७२ सदस्यीय प्रदेश सचिवालयमा मकवानपुरबाट पौडेल, कृष्णप्रसाद दाहाल, रामचन्द्र राई, नेकपा मकवानपुरकी अध्यक्ष मुनु सिग्देल, सचिव प्रेमबहादुर पुलामी तथा नेता विष्णु विष्टलाई चयन गरेको छ ।
