गाँजा तस्कर गर्ने नयाँ साधन “अटाे”, तीन जना पक्राउ
हेटौंडा । मकवानपुर प्रहरीले लागु औषध गाँजा सहित तीन जनालाई पक्राउ गरेको छ ।
यस पटक प्रहरीले एम्बुलेन्स, सार्वजनिक यातायात, जीप, कारमा हाेइन प्राय: छाेटाे दुरीकाे लागि प्रयाेग गरिने सार्वजनिक सवारी साधन अटाेमा गाँजा तस्कर गरेकाे फेला पारेकाे छ ।
प्रहरीले विशेष सूचनाको आधारमा हेटौँडा ११ बाट मनहरी गाउँपालिका वडा नंबर ८ का जीवन मोक्तान, पर्सा जिल्ला विरगञ्ज उपमहानगरपालिका १० का राजेश पटेल र मुन्ना अन्सारीलाई पक्राउ गरेको छ ।
उनीहरुको साथबाट १४ किलो ९ सय ग्राम गाँजा समेत बरामद भएको जिल्ला प्रहरी कार्यालय मकवानपुरले जानकारी दिएको छ । गाँजा ओसारपसारमा प्रयोग भएको ना १ ह ९७६४ नंबरको अटोलाई समेत प्रहरीले नियन्त्रणमा लिएको जिल्ला प्रहरी कार्यालय मकवानपुरका प्रहरी उपरिक्षक मुकेश कुमार सिंहले बताउनुभयो ।
