जीप दुर्घटनामा २ जनाको मृत्यु
२ साउन, काठमाडौं । शुक्रबार जीप दुर्घटना हुँदा २ जनाको मृत्यु भएको छ ।
बाजुराको जगन्नाथ गाउँपालिका-५ जुवाखोलामा शुक्रबार बिहान भएको दुर्घटनामा परी चालकसहित २ जनाको मृत्यु भएको छ भने ११ जना घाइते भएका छन् । घाइतेमध्ये ४ जनाको अवस्था गम्भीर छ ।
दुर्घटनामा परी टीकापुर नगरपालिका–४ का घर भएका २६ वर्षीय चालक रमेश बोगटी र खत्याड गाउँपालिका–६, मुगुका २४ वर्षीय रामबहादुर शाहीको घटनास्थलमा मृत्यु भएको हो ।
गम्भीर घाइतेलाई उपचारका लागि नेपालगञ्ज लैजान हेलिकोप्टर मगाइएको छ । अन्य घाइतेको भने कोल्टी स्वास्थ्य केन्द्रमा नै उपचार भइरहेको छ ।
दुर्घटनाग्रस्त जीप बाजुराको फिलुचौरबाट कालिकोटको जितेगडा तर्फ जाँदै थियो । जीप सडकबाट तल खसेको थियो । जीपमा चालकसहित १५ जना सवार रहेको प्रहरीले जनाएको छ ।
