पुस ११ गतेसम्म सिस्नेरी-दक्षीणकाली सडक बन्द
हेटौंडा । हेटौंडा–काठमाडौं जोड्ने छोटो दुरीको मार्ग सिस्नेरी सडकखण्डमा सवारी संचालनमा रोक लगाइएको छ । सडक निर्माणको काम गर्ने भएकाले एक साता भन्दा बडी समयका लागि सवारी सञ्चालनमा रोक लगाइएको हो ।
दक्षिणकाली–छैमले खण्ड कालोपत्रे गर्ने भएकोले उक्त सडकखण्डमा सवारी संचालनमा रोक लगाइएको जिल्ला प्रहरी कार्यालय मकवानपुरका प्रहरी नायब उपरिक्षक श्यामु अर्यालले बताए । यस्तै, सडक स्तरोन्नतीको लागि कुलेखानी–फाखेल–मातातिर्थ सडकमा पनि यातायात संचालनमा रोक गराइएको छ ।
सो सडक बन्द हुँदा सवारी साधनलाई वैकल्पिक मार्ग हेटौंडाबाट काठमाडौं जोड्ने कान्तिलोकपथ सडकखण्ड, त्रिभुवन राजपथ, नारायणगढ मुग्लिन सडकखण्डमा भने हाल सवारीसाधन संचालन भइरहेको प्रहरी नायव उपरीक्षक अर्यालले बताए ।
