नक्कली भुटानी शरणार्थी प्रकरणमा आज जवाफी बहस हुने
काठमाडौं । नक्कली भुटानी शरणार्थी प्रकरणमा पक्राउ परेकाहरुको जवाफी बहस आज शुरु हुँदैछ ।
बिहीबारबाट सबै प्रतिवादीहरु तर्फका कानुन व्यवसायीहरुको बहस सकिएपछि आज जवाफी बहस हुन लागेको हो ।
सरकारी वकिलको कार्यालय काठमाडौंका प्रमुख अच्यूतमणि न्यौपानेसहित ४ जना कानुन व्यवसायीहरुले जवाफी बहस गर्नेछन् । काठमाडौं जिल्ला अदालतका न्यायाधीश प्रेमप्रसाद न्यौपानेले आज २ बजेभित्र बहस सक्न निर्देशन दिइसकेका छन् ।
जवाफी बहस सकिएपछि धरौटीमा छाड्ने वा थुनामै राखेर मुद्दा अघि बढाउने भन्नेबारे आदेश आउने बताइएको छ ।
नेपाली नागरिकलाई नक्कली भुटानी शरणार्थी बनाउने प्रकरणमा हालसम्म १८ जना पक्राउ परिसकेका छन् । भने अन्य १२ जना अझै फरार रहेका छन् ।
