हेटाैँडामा अटाेमा गाँजा ओसार्ने २ महिला सहित तीन जना पक्राउ
हेटौंडा । मकवानपुरको हेटौंडा उपमहानगरपालिका–११ बाट लागुऔषधमा ओसारपसारमा संलग्न दुई महिला सहित तीन जना पक्राउ परेका छन् । पक्राउ पर्नेमा अटो चालक हेटौंडा–१९ बस्ने ६० वर्षीय प्रेम बहादुर थिङ, हेटौंडा–३ बसामाडी बस्ने ४० वर्षीया कबिता थिङ र हेटौंडा–३ कै ३६ वर्षीया सिरसानी मोक्तान रहेका छन् ।
जिल्ला प्रहरी कार्यालय मकवानपुरबाट खटिएको प्रहरी टोलीले हेटौंडा–११ स्थित सवारी साधनहरु चेकजांच गर्ने क्रममा ना२ ह २३६३ नम्बरको अटोबाट११ किलो २०० ग्राम लागुऔषध गाँजा सहित तीन जनालाई पक्राउ गरेको हो । उक्त लागुऔषधसहित तीनै जनालाई नियन्त्रणमा लिएर थप अनुसन्धान भईरहेको प्रहरीले जनाएको छ ।
