तीन महिनापछि कर्णाली सरकारले पायो पूर्णता
सुर्खेत । तीन महिनापछि कर्णाली सरकारले पूर्णता पाएको छ। जीवनबहादुर शाही मुख्यमन्त्री नियुक्त भएको तीन महिनाभन्दा लामो समयपछि मन्त्रिपरिषद्ले पूर्णता पाएको हो। कात्तिक १६ गते शाही मुख्यमन्त्री नियुक्त भएका थिए।
सत्ता साझेदार दलबीच मन्त्रालय भागबन्डामा सहमति नभएपछि लामो समयदेखि मन्त्रिपरिषद् विस्तार हुन सकेको थिएन।
आइतबार पाँच मन्त्रीले शपथ लिएका छन्। शपथसँगै मन्त्रिपरिषद्ले पनि पूर्णता पाएको छ।
कार्यविभाजन अनुसार कांग्रेसका यज्ञबहादुर विसीले सामाजिक विकास मन्त्रालय, कांग्रेसकै हिमबहादुर शाहीले आन्तरिक मामिला तथा कानुन मन्त्रालय, नेकपा (माओवादी केन्द्र) का गणेशप्रसाद सिंहले जलस्रोत तथा ऊर्जा विकास मन्त्रालय पाएका छन्।
त्यस्तै माओवादी केन्द्रकै कार्चेन लामाले उद्योग, पर्यटन, वन तथा वातावरण मन्त्रालय र एकीकृत समाजवादीका पदम रोकायले भौतिक पूर्वाधार तथा शहरी विकास मन्त्रालयको जिम्मेवारी पाउने मुख्यमन्त्री तथा मन्त्रिपरिषद्को कार्यालय जनाएको छ।
कर्णालीमा मुख्यमन्त्रीसहित आठ मन्त्रालय छन्। जसमा माओवादी केन्द्रका विन्दमान विष्टले आर्थिक मामिला तथा योजना मन्त्रालय र समाजवादीका संसदीय दलका नेताले भूमि, व्यवस्था, कृषि तथा सहकारी मन्त्रालयको जिम्मेवारी पाइसकेका छन्।
कर्णाली प्रदेश सरकारले पूर्णता पाए पनि मन्त्रिपरिषद् भने महिलाविहीन बनेको छ । सरकारमा मुख्यमन्त्रीसहित आठ जना मन्त्रीहरू छन्, तर ती सबै पुरुष हुन् । मन्त्री बन्नसक्ने क्षमता भएका महिला सांसद भए पनि राजनीतिक दलहरूले महिलालाई मन्त्री पदका लागि सिफारिस गरेनन् ।
यसअघि नेकपा माओवादी केन्द्रबाट विमला केसी र सीताकुमारी नेपाली मन्त्री भएका थिए । तर, नेपाली कांग्रेस, नेकपा माओवादी केन्द्र र नेकपा एकीकृत समाजवादीको तीन दलीय गठबन्धनको सरकारले महिलालाई उपेक्षा गरको हो ।
