एमालेमा ‘बा’ संस्कृति बढेकाे भन्दै कर्माचार्यसहितका नेताहरु समाजवादीमा प्रवेश
सिन्धुपाल्चोक । सिन्धुपाल्चोकबाट एमाले सिन्धुपाल्चोकका पुराना नेता सुवास कर्माचार्यसहित ५० भन्दा बढी युवा विभिन्न पार्टी परित्याग गरी नेकपा एसमा प्रवेश गरेका छन् । बुधबार काठमाडौंमा आयोजित एक कार्यक्रममा नेकपा एसका अध्यक्ष माधवकुमार नेपालले उनीहरुलाई पार्टीमा स्वागत गरेका हुन् ।
नेकपा एमालेमा ‘बा’ संस्कृति बढेको भन्दै पार्टी छाडेका उनी बुधबार समाजवादीतिर प्रवेश गरेका हुन्। काठमाडौंमा आयोजित एक कार्यक्रमा बरु कुकुरको पुच्छर बाह्रमा सोझिएला तर एमाले नसुध्रिने देखेपछि आफू समाजवादीतिर लागेको बताएका छन्। कर्माचार्य सिन्धुपाल्चोकमा एमालेका पुराना नेता हुन्। उनी २०३७/३८ सालदेखि वाम आन्दोलनमा थिए।
एमाले सिन्धुपाल्चोकको नेतृत्वमा पुगिसकेका उनी पूर्वसांसद पनि हुन्। चार दशक भूगोलको राजनीति गरेका उनी यो पटक केन्द्रीय सदस्य नभएपछि समाजवादीतिर लागेका हुन्।
नेकपा एस प्रवेश गर्नेहरुमा अधिकांश नेकपा एमालेका छन् । नेकपा एमाले प्रतिनिधि परिषद् सदस्य सीता थापा, ईश्वरीप्रसाद श्रेष्ठ, नेकपा एमालेको वागमती प्रदेश कमिटी सदस्य यज्ञ सापकोटा, नेकपा एमाले सिन्धुपाल्चोक–काठमाडौं सम्पर्क मञ्चका पूर्वअध्यक्ष दीपक नेपाल, एमाले जिल्ला कमिटी सदस्य रवीन्द्र शर्मा, विष्णुलाल श्रेष्ठ, भरत थापालगायत नेकपा एसमा प्रवेश गरेका हुन् । त्यस्तै नेपाली कांग्रेसका महासमिति सदस्य गुणनिधि लम्साल पनि नेकपा एसमा लागेका छन् ।
त्यस्तै माओवादी केन्द्र परित्याग गरी केही कार्यकर्ता नेकपा एसमा लागेका छन् । सिन्धुपाल्चोकका प्रभावशाली नेता सुवास कर्माचार्यको नेतृत्वमा उनीहरु नेकपा एस प्रवेश गरेका हुन् ।
