एमाले भक्तपुरको अध्यक्षमा बचन देउजा चयन
भक्तपुर । नेकपा एमाले भक्तपुर जिल्ला कमिटीको अध्यक्षमा बचन देउजा सर्वसम्मत चयन भएका छन् । शनिबार जारी पार्टीको आठौं जिल्ला अधिवेशनको बन्द सत्रबाट देउजा अध्यक्ष भएका हुन् ।
एमाले भक्तपुर जिल्ला कमिटीको उपाध्यक्षमा बासुदेव थापा, सचिवमा मोहन वीर श्रेष्ठ, उप सचिवमा दामोदर दंगाल र मिलन सुवाल चयन भएको निर्वाचन समितिका संयोजक शिवराम तिमल्सिनाले जानकारी दिए।
नेकपा एमाले मोरङको नवौं अधिवेशनबाट अध्यक्षसहित पदाधिकारी निर्विरोध चयन भएका छन् । निर्वाचन समितिले तय गरेको निर्वाचन तालिकाअनुसार अध्यक्षमा ऋषिकेश पोखरेल, उपाध्यक्षमा बाबुराम कार्की, सचिवमा रुपेश खतिवडा, सहसचिवमा शान्ति कुमारी लिम्बू र सन्तोष साहको मात्रै उम्मेदवारी परेसँगै उनीहरु सर्वसम्मत चयन भएका हुन् ।
यस्तै एमाले पाल्पा जिल्ला अध्यक्षमा धनेन्द्रराज घिमिरे निर्विरोध चयन भएका छन् ।
शुक्रबार राति सम्पन्न अधिवेशनबाट उपाध्यक्षमा देविलाल लामिछाने, सचिवमा रामजी पोखरेल, सहसचिवमा टीका थापा र सुनिता शर्मा निर्विरोध चयन भएका हुन् । पाल्पाका ८१ वटै वडालाई समेटेर बनाइएको एमाले जिल्ला कमिटी १०५ सदस्यीय बनाईको छ ।
यस्तै नेकपा एमाले दाङको अध्यक्षमा हुकुम बस्नेत निर्विरोध चयन भएका छन् । अध्यक्षको रेसमा रहेका अर्का एमालेका पुराना नेता शिवकुमार आचार्यले आफ्नो दाबी छाडेपछि बस्नेत निर्विरोध अध्यक्ष भएका हुन् ।
एमालेको शुक्रबार र शनिबार चलेको १३औ जिल्ला अधिवेशनबाट बस्नेतको नेतृत्वमा नयाँ कार्य समिति चयन भएको छ । एमालेको शुक्रबार राती अबेरसम्म जारी बन्द सत्रमा नेतृत्वको घोषणा गरिएको थियो ।
यस्तै उपाध्यक्षमा राममणि पाण्डे चयन भएका छन् । उनी यसअघि एमालेको घोराहीको नगर सभापति र जिल्ला उपाध्यक्षको जिम्मेवारी समेत सम्हालिसकेका छन् ।
