मुख्यमन्त्रीलाई कोरोना संक्रमण पुष्टि
दिल्लीका मुख्यमन्त्री केजरीवाललाई कोरोना संक्रमण
काठमाडौं। भारतको राजधानी नयाँ दिल्लीका मुख्यमन्त्री अरविन्द केजरीवाललाई कोरोना संक्रमण पुष्टि भएको छ। केजरीवालले सामाजिक सञ्जाल मार्फत आफूलाई कोभिड संक्रमण पुष्टि भएको जानकारी दिएका हुन्।
आफ्नो स्वास्थ्य अवस्था ठीक रहेको र हाल निवासमै एकान्तबासमा बसेको उनले बताएका छन्। दिल्लीका मुख्यमन्त्री केजरीवालले पछिल्लो समयमा आफ्नो सम्पर्कमा आएका व्यक्तिहरुलाई स्वास्थ्यमा ध्यान दिन आग्रह गरेका छन्।
भारतीय सरकारले जनाएअनुसार पछिल्लो २४ घण्टामा मात्रै भारतमा ३७ हजार ३ सय ७९ जनामा कोभिड संक्रमण पुष्टि भएको छ। कोभिडको नयाँ भेरियन्ट ओमिक्रोनबाट संक्रमित हुने मानिसको संख्या बढ्दै जाँदा दैनिक कोभिड संक्रमितको संख्या बढेको हो।
