स्पेनिस लालिगा: घरेलु मैदानमै पछारियाे बार्सा, उपाधि दाबेदारीबाट बाहिरियो
काठमाडौं । स्पेनिस लालिगा फुटबलअन्तर्गत गएराति भएको खेलमा बार्सिलोनाले हार व्यहोरेको छ । बार्सिलोनालाई उसैको मैदानमा सेल्टा भिगोले २-१ ले हराएको हो ।
भिगोको जीतमा सान्ती मिनाले २ गोल गरेका थिए भने बार्सिलोनाका लागि कप्तान लियोनल मेस्सीले गोल गरेका थिए । भिगोले खेलको अन्त्यमा विजयी गोल गरेको थियो ।
खेलमा सुरुवाती अग्रता बार्सिलोनाले लिएको थियो । २८औं मिनेटमा मेस्सीले गोल गर्दै घरेलु टोलीलाई अग्रता दिलाए । ३८औं मिनेटमा मिनाले गोल फर्काउँदै खेल बराबरीमा ल्याए ।
दोस्रो हाफको अन्त्यतिर ८९औं मिनेटमा मिनाले व्यक्तिगत दोस्रो गोल गर्दै सेल्टा भिगोलाई खेल जिताए । जीतसँगै सेल्टा भिगो ५३ अंकसहित आठौं स्थानमा छ ।
महत्वपूर्ण खेलमा पराजित भएसँगै बार्सिलोना उपाधि होडबाट बाहिरिएको छ । बार्सिलोना ३७ खेलबाट ७६ अंकमा सीमित रह्यो । अब सबै टोलीले एक-एक खेल खेल्न बाँकी छ र रियल मड्रिड र एट्लेटिको मड्रिड क्रमशः ८१ र ८३ अंकमा छन् ।
