राजीनामा स्विकृत भएसँगै पुनः मुख्यमन्त्री बन्ने गृहकार्यमा शंकर पोखरेल
बुटवल । अविश्वासको प्रस्तावको सामना गर्नुपूर्व लुम्बिनी प्रदेशका मुख्यमन्त्री शंकर पोखरेलले पदबाट राजीनामा दिए । पोखरेलको राजीनामा पुनः मुख्यमन्त्री बन्ने सजिलो बाटो सुनिश्चितको लागि आएको उनी निकटष्ठहरु बताउँछन् ।पोखरेलले संविधानको धारा १६८ को उपधारा १ अनुसार बहुमत प्राप्त संसदीय दलको नेताको हैसियतले पुनः सरकार बनाउन राजीनामा दिएको स्रोतको दावी छ । उक्त प्रदेशमा नेकपा एमाले ४१ सांसदसहित बहुमत प्राप्त दल हो । उनलाई विश्वासको मतका लागि केवल ४१ सांसद चाहिन्छ । तर मतदानमा जाँदा माधव नेपाल समूहबाट फ्लोर क्रस हुने भएकोले उनले सुरक्षित बाटो रोजेका हुन् ।
अहिले लुम्बिनी प्रदेशमा जसपाका ४ र माओवादी केन्द्रका २ गरी ६ जना प्रदेश सभा सदस्य पदमुक्त भएपछि ८१ सदस्यमात्र छन् । एमालेका ४१ सांसद भएकाले अब एमालेको एकल बहुमत हुनेछ । नेकपा एमाले लुम्बिनीका प्रमुख सचेतक भुमिश्वर ढकालका अनुसार राजीनामासँगै एकल सरकार बनाउन मुख्यमन्त्री पाेखरेलले राजीनामा दिएका हुन् ।यसैबीच, लुम्बिनी प्रदेशका मुख्यमन्त्री शंकर पोखरेलले पदबाट दिएको राजीनामा स्वीकृत भएको छ।
