जेलमा रहेपनि पार्टीले गरेकाे निर्णयमा मेरो समर्थन रहन्छ : रेशम चौधरी
काठमाडौं । जनता समाजवादी पार्टी (जसपा) का निलम्बित सांसद रेशम चौधरीले पार्टीले जस्तो निर्णय गर्छ त्यसैमा आफ्नो समर्थन रहने बताएका छन् । पार्टीले गर्ने निर्णयमा आफू बाधक नहुने भन्दै उनले आफूबारे सार्वजनिक सञ्चारमाध्यममा कपोलकल्पित समाचार आइरहेको प्रति ध्यानाकर्षण भएको बताए ।
उनले एक पत्र सार्वजनिक गरी पार्टीको निर्णयमा आफ्नो समर्थन हुने बताएका हुन् । उनले जेलमा भएपनि आफू सांसद रहेको र आफ्नो मर्यादा आफैंलाई थाहा भएको बताए ।
पार्टीको विधि, पद्धती र प्रक्रिया अनुसार अध्यक्ष महन्थ ठाकुरले काम गरिरहेको भन्दै उनले सरकारमा सहभागि हुने र नहुने भन्ने कुरा पार्टीको बैठकले गर्ने निर्णयमा भर पर्ने बताए ।
कैलालीको टीकापुर घटनामा दोषी ठहर भई सर्वस्वसहित जन्मकैदको सजाय काटिरहेका चौधरीले सरकारमा जान आफूलाई सर्त बनाइएको, रिहा हुनै नसक्ने जस्ता समाचार आएकोप्रति ध्यान आकर्षण भएको बताएका ह्न् ।
उनी कैलाली १ बाट प्रत्यक्षतर्फ विजयी भएका सांसद हुन् । उनी जिल्ला र उच्च अदालतबाट टीकापुर घटनामा दोषी ठहर भएका थिए। घटना लगत्तै फरार रहेका उनी पछि अदालतमा उपस्थित भएका थिए।
आन्दोलनका क्रममा टीकापुरमा एक बालकसहित ८ जना व्यक्तिको ज्यान गएको थियो। पछिल्ला केही दिनमा उनलाई केन्द्रमा राखेर जनता समाजवादी पार्टीले सरकारको अजेन्डा बनाएको छ। सरकार र विपक्षी दलहरुसँगको छलफलमा चौधरीको मुद्दा उठिरहेको छ।
चौधरीलाई माफी दिएमा उनको सांसद पद रहँदैन र सर्वोच्च पुगेकाले मुद्दा फिर्ता लिन नमिल्ने कानुनी व्यवस्थाका कारण जसपाले कुनै पनि पक्षसँग सहमति गर्न सकेको छैन।
