आज बामदेव गाैतमले बल्खुमा छुट्टै बैठक डाके
काठमाडौं । नेकपा एमालेका उपाध्यक्ष वामदेव गौतमले बल्खुमा छुट्टै बैठक बोलाएको छ । बल्खुस्थित सिद्धिगणेश पार्टी प्यालेसमा ओलीले गरेको एकलौटी निर्णयविरुद्ध बिहान ११ बजे बैठक बोलाइएको उनलको सचिवालयले जनाएको छ ।
आफू संयोजक रहेको ‘नेपाल कम्युनिस्ट पार्टी एकता राष्ट्रिय अभियान’को बैठकका लागि उनले आफू निकटका नेताहरुलाई बोलाएका छन् । आज अभियानको कार्यसमिति नभई कार्यसम्पादन समितिको सानो समूहबीच छलफल गर्न सचिवालयले जनाएको छ ।
यही फागुन २८ गते आफूपक्षीय केन्द्रीय सदस्यको बैठक राखेर ओलीले एमालेमा अध्यक्ष र महासचिवबाहेक सबै पद हटाउने निर्णय गरेपछि नेता गौतमको उपाध्यक्ष पद पनि स्वतः खारेज भएको छ। त्यसलगत्तै गौतमले अबदेखि अध्यक्ष ओलीसँग मिलेर जाने सबै सम्भावना समाप्त भएको घोषणा गरेका थिए।
