कस्मिरमा आतंककारीले कारमै गाेली हानेर भाजपाका ३ नेताको हत्या गरे
एजेन्सी । दक्षिणी कस्मिरको कुलगाममा बिहीबार साँझ आतंककारीले गोली हानेर भारतीय जनता पार्टी (भाजपा) का नेता फिदा हुसैनसहित ३ जनाको हत्या गरेका छन्।
भारतीय पत्रिका दैनिक भास्करका अनुसार हुसैन, कुलगाम भाजपा युवा मोर्चाका महासचिव थिए। उनीसहित उनका दुई कार्यकर्ता- उमर रासिद बेग र उमर रमजान हाजमको हत्या भएको हो।
एक जनाको घटनास्थलमै र अन्य दुई जनाको अस्पताल लानेबित्तिकै मृत्यु भएको दैनिक भास्करले उल्लेख गरेकाे छ। तर कसको घटनास्थलमै र ककसको अस्पताल लानेबित्तिकै मृत्यु भएको हो, पत्रिकाले खुलाएको छैन।
फिदा हुसैन काजिगुन्ड बस्थे। हुसैनविरुद्ध त्यसबेला हमला भयो, जतिबेला उनी कारमा कार्यकर्ताका साथ घरतर्फ जाँदै थिए।
आतंकवादी एक गाडीमा आए र फिदालाई कारमै गोली हानेर भागे। सुरक्षाकर्मीले आक्रमणकारीको खोजी गरिरहेको जनाएका छन्।
द रजिस्टेन्स फ्रन्ट (टीआरएफ) नामक संगठनले आक्रमणको जिम्मेवारी लिएको छ।
यो संगठन लक्सर ए तैयबाको सहयोगी भएको बताइएको छ। बान्दीपोरामा भाजपाकै नेता बसिम बारीको हत्या हुँदा पनि यही संगठनको नाम आएको थियो।
Terrorists shot dead three BJP leaders including its general secretary for 'Yuva Morcha' in south #Kashmiri Kulgam district.
1. Fida Hussian Itoo (YK Pora)
2. Umer Rashid Beigh (Sopat)
3. Umer Ramzan Hanan (YK Pora) @BJPLive @KashmirPolice @ChinarcorpsIA @Tejasvi_Surya pic.twitter.com/m9PBSaFtrC— Sumit Chaudhary (@sumit0707) October 29, 2020
