४० हजार मानिसमा काेराेना खोप परीक्षण गर्दै रुस
एजेन्सी । रुसले आफूले उत्पादन गरेको कोरोना खोपको आमरुपमा परीक्षणको तयारी सुरु गरेको छ । यस अन्तर्गत ४० हजारभन्दा धेरै मानिसमा यो खोप लगाइनेछ ।
परीक्षणको काम आउने हप्ताबाट सुरु हुनेछ । यसमा विदेशी अनुसन्धान एजेन्सीहरुलाई पनि सहभागी गराइनेछ ।
रुसले परीक्षणका लागि खोपको २ हजार डोज मेक्सिको पठाउने निर्णय गरेको छ ।
यसैबीच, विश्व स्वास्थ्य संगठन (डब्ल्यूएचओ) लाई पनि रुसले आफ्नो खोपको जानकारी पठाएको छ । रुसले ११ अगस्टमा कोरोनाविरुद्धको खोप स्पुतनिक तयार गरेको घोषणा गरेको थियो ।
अहिलेसम्म संसारमा कोरोना भाइरस संक्रमितको २ करोड २७ लाख २० हजार २९४ केस बाहिर आइसकेको छ । यीमध्ये १ करोड ५४ लाख ६ हजार ५०४ जना निको भइसकेका छन् भने ७ लाख ९३ हजार ७०८ जनाको कोरोना संक्रमणको कारण मृत्यू भइसकेको छ ।
