एसी मिलानको इटालियन सिरी ए फुटबलमा अपराजित यात्रा कायमै
काठमाडौं । इटालियन सिरी ए फुटबलअन्तर्गत गएराति सम्पन्न खेलमा एसी मिलानले जीत निकालेको छ । उसले १० खेलाडीमा सीमित सासुलोलाई उसैको मैदानमा २-१ ले हरायो ।
मिलानको जीतमा दुवै गोल ज्लाटान इब्राहिमोभिचले गरे भने सासुलोका लागि फ्रान्सिस्को कापुतोले एक गोल फर्काए । इब्राले खेलको १९औं मिनेटमा गोल गर्दै मिलानलाई अग्रता दिलाएका थिए । ४२औं मिनेटमा कापुतोले पेनाल्टीमार्फत गोल फर्काएका थिए ।
त्यसलगत्तै पहिलो हाफको इन्ज्युरी समयमा पुनः इब्राहिमाभिचले नै गोल गरेपछि मिलानले पुनः अग्रता लियो । इन्ज्युरी समयमा नै सासुलोका मेहदी बौराबियाले रातो कार्ड खाँदै मैदानबाट बाहिरिएपछि सासुलो दस खेलाडीमा सीमित भएको थियो ।
खेलमा त्यसपछि थप गोल हुन सकेन र मिलानले आफ्नो अपराजित यात्रा कायमै राख्न सफ भयो । जीतसँगै मिलानको ३५ खेलबाट ५९ अंक भएको छ र अंकतालिकाको पाँचौ स्थानमा यथावत् रहँदा सासुलोको समान खेलबाट ४८ अंक छ र आठौं स्थानमा यथावत् छ ।
