वेस्टह्याम युनाइटेडले वाटफोर्डसँगकाे खेलमा सहजै तीन अंक बटुल्याे
काठमाडौं । इंग्लिस प्रिमियर लिगअन्तर्गत गएराति सम्पन्न खेलमा वेस्टह्याम युनाइटेडले सहज जीत दर्ता गरेको छ । महत्वपूर्ण ३ अंक बटुल्ने क्रममा उसले वाटफोर्डलाई ३-१ ले हरायो ।
वेस्टह्यामको जीतमा मिकेल एन्टोनियो, टोमास साउसेक र डेक्लान राइसले एकएकगोल गरे । वाटफोर्डका लागि ट्रोय डिनेले सान्त्वना गोल फर्काए ।
खेलको छैटौं मिनेटमै एन्टोनियोले गोल गर्दै वेस्टह्यामलाई अग्रता दिलाए । त्यसपछि १०औं र ३६औं मिनेटमा क्रमशः साउसेक र राइसले गोल गरेपछि वेस्टह्यामले पहिलो हाफमै ३-० को अग्रता बनाएको थियो । वाटफोर्डका डिनेले ४९औं मिनेटमा एक गोल फर्काए पनि खेलमा त्यसपछि कुनै गोल हुन सकेन ।
जीतसँगै ३६ खेलबाट ३७ अंक बटुलेको वेस्टह्याम अंकतालिकाको १५औं स्थानमा उक्लिएको छ । पराजित वाटफोर्डको समान खेलबाट ३४ अंक रहेको छ र तालिकाको १७औं स्थानमा यथावत् छ ।
वेस्टह्यामको रेलिगेसनमा पर्ने सम्भावना घट्दै जाँदा वाटफोर्ड भने अझै रेलिगेसनको खतरामा रहेको छ । वाटफोर्डले अब म्यानचेस्टर सिटी र आर्सनलसँग खेल्न बाँकी रहेकाे छ ।
