२४ घण्टामा अमेरिकामा ४४ हजार कोरोना संक्रमित फेला परे
एजेन्स । अमेरिकामा एकैदिन ४४ हजारभन्दा बढी कोरोना संक्रमित फेला परेका छन् । पछिल्लो केही दिनयता लगातार अमेरिकामा ४० हजारभन्दा बढी संक्रमित फेला पर्दै आइरहेका छन् । अमेरिकामा कोरोना भाइरस नियन्त्रणबाहिर गएको अधिकारीहरुले जनाएका छन् । अमेरिकामा हालसम्म २९ लाख ८२ हजारभन्दा बढी संक्रमितको संख्या पुगेको छ ।
अमेरिकामा हालसम्म कोरोना संक्रमणका कारण १ लाख ३२ हजार ५६९ भन्दाबढी संक्रमितको ज्यान गइसकेको छ । आइतबारमात्रै २५१ जनाभन्दा बढी संक्रमितको मृत्यु भएको छ । पछिल्लो समय भने मृत्यु हुनेको संख्यामा कमी आएको तर, संक्रमणदर उच्च रहेको छ ।
संक्रमणदर बढेका कारण मृत्युदर बढ्ने सम्भावना बढेको बताइएको छ ।
१२ लाख ८९ हजारभन्दा बढी संक्रमित उपचारपछि घर फर्किएका छन् । झण्डै १६ हजारको अवस्था गम्भीर रहेको छ ।
