सवारी दुर्घटना हुँदा दुई जनाको मृत्यु, ४ घाइते
नवलपरासी । पूर्वीनवलपरासीमा भएको दुई छुट्टाछुट्टै सवारी दुर्घटनामा परी दुई जनाको ज्यान गएको छ भने ४ जना गम्भीर घाइते भएका छन् ।
जिल्ला प्रहरी कार्यालय, नवलपुरका अनुसार, मंगलबार साँझ गैंडाकोटबाट पहाडी मार्ग बुलिङ्गटार जाँदै गरेको अ यो ००२७ नम्बरको बलेरो जिप सडकबाट अन्दाजी एक सय मिटर तल खसेर दुर्घटना भएको हो ।
दुर्घटनामा परी गम्भीर घाइते दाङका ५३ वर्षीय विमलचन्द्र सुवेदीको उपचारको क्रममा नयाँ मेडिकल कलेज भरतपुरमा निधन भएको प्रहरीले जनाएको छ ।
दुर्घटनामा जिप चालक राप्ती नगरपालिका–४, चितवनका २२ वर्षीय निर्जल हुमागाई, रौतहटको वागमती नगरपालिका–२ का ३९ वर्षीय दलबहादुर सलामी मगर, नुवाकोट ककनी नगरपालिका–४ का २६ वर्षीय रितिक लामा र २६ वर्षीय गौतम घले घाइते भएका छन् । उनीहरुको नयाँ मेडिकल कलेज भरतपुरमा उपचार भइरहेको छ ।
त्यसैगरी, गएराति नै गैंडाकोट नगरपालिका–५ मा ना ३ च २२६१ नम्बरको बोलेरोले पैदल यात्रीलाई ठक्कर दिँदा १ जनाको ज्यान गएको छ ।
इलाका प्रहरी कार्यालय, गैंडाकोटका अनुसार, गम्भीर घाइते पालुङटार गाउँपालिका–१०, गोरखाका ३५ वर्षीय ज्ञानबहादुर कुँवरको नयाँ मेडिकल कलेज भरतपुरमा उपचारको क्रममा निधन भएको हो ।
प्रहरीले जिप र त्यसका चालकलाई नियन्त्रणमा लिएको छ ।
