कोरोनाबाट बच्न भन्दै घरेलु रक्सी खाँदा ज्यान गयो
एजेन्सी । कोरोना भाइरसले आतंक मच्चाइरहेको इरानमा रक्सी सेवनबाट बिरामी हुने मानिसको संख्या पनि बढिरहेको छ ।
समाचार अनुसार उच्च मात्रामा मिथानोल मिसाइएको रक्सी खाँदा मानिसको ज्यान गएको बताइएको छ । मिथानोल भनेको सोलभेन्ट, पेस्टिसाइड वा विषादी र इन्धनको रुपमा प्रयोग गरिने रसायन हो ।
मिथानोल मिसाइएको रक्सी सेवनबाट आँखाको ज्योति गुम्ने, मस्तिष्कमा हानि पुग्ने वा हृदयघात हुने जोखिम पनि हुने गर्छ ।
इरानमा सन् १९७९ को इस्लामिक क्रान्तिपछि मध्यपानमाथि प्रतिबन्ध लगाएको छ । तर कतिपय मानिसहरूले गोप्य रुपमा घरमा रक्सी बनाउने र सेवन गर्ने गरेको पाइन्छ । यसरी घरमा रक्सी बनाउँदा मिथानोल मिसाइने गरिन्छ ।
कोरोना भाइरसबाट हालसम्म इरानमा १९४ जनाले ज्यान गुमाइसकेका छन् । त्यस्तै संक्रमित हुनेको संख्या ५ हजार ८ सय २३ पुगेको छ ।
यता राष्ट्रिय ध्वजाबाहक इरान एयरले युरोपतर्फका सबै उडान बन्द गरेको अन्तर्राष्ट्रिय समाचार माध्यमले जनाएका छन् ।
सुरुमा चीनको वुहानमा देखा परेको कोरोना भाइरस हालसम्म ८१ मुलुकमा फैलिइसकेको छ । विश्वभर भाइरसबाट संक्रमित हुनेको संख्या १ लाख ७ हजार २ सय ३३ पुगेको छ । त्यस्तै ३ हजार ६ सय २९ जनाले ज्यान गुमाइसकेका छन् ।