युवाहरु सपना देख्छन्, बुढाहरुले संस्मरण लेख्छन्ः वरिष्ठ उपाध्यक्ष राई
काठमाडौं । समाजवादी पार्टीका वरिष्ठ उपाध्यक्ष अशोक राईले राजनीतिक नेतृत्व युवालाई छाड्नुपर्ने बेला भएको बताएका छन् ।
तत्कालीन नयाँ शक्ति पार्टी, नेपाल र सङ्घीय समाजवादी फोरम, नेपालको काठमाडौँ, ललितपुर र भक्तपुरको जिल्ला पार्टी कमिटीको काठमाडौंमा भएको समायोजन घोषणा कार्यक्रममा बोल्दै नेता राईले उक्त कुरा बताएका हुन् । ‘युवाहरुले सपना देख्छन्, बुढाहरुले संस्मरण लेख्छन्,’ उनले भने, ‘अब संस्मरण लेख्ने ठाउँतिर हामी गइसकेका छौं र सपना देख्ने ठाउँमा तपाईं युवाहरु हुनुहुन्छ ।’
उनले नयाँ पुस्ताले राजनीतिमा मेहनत गरेर अगाडि बढ्नुपर्नेमा जोड दिए । उनले भने, ‘अब तपाईंहरुले मेहनत गरेर अगाडि जानुपर्छ । हिजो हामी पनि युवा हुँदा हामीसँग सपनाहरु थिए । म २१ वर्षको उमेरमा सारा पढाई, जागिर, घर, परिवार छोडेर भूमिगत भएर हिंडेको । ३३ वर्षमा सांसद भएको, ३७ वर्षमा त मन्त्रि भइसकेको थिएँ ।’
बुढेसकाल लागेपछि युवा उमेरको जस्तो ऊर्जा बाँकी नरहने अनुभूति उनले कार्यक्रममा राखे । ‘तर अब ६०को सिमानामा पुगिसकेपछि हिजोको जस्तो ऊर्जा हुँदैन । अनुभव हुन्छ, ऊर्जा हुँदैन, उनले भने, ‘त्यसो भएर ऊर्जा र अनुभवलाई मिलाएर लग्नुपर्छ । यसको अर्थ हामी बुढाहरु अब रिटायर हुने भनेको होइन । अझै हामी केही गर्न चाहन्छौं । तर, मुख्य जिम्मा अब युवाहरुले लिनुपर्दछ । मेरो शुभकामना छ युवा नेतृत्वहरुलाई ।’
भेलाले समाजवादी पार्टी काठमाण्डौं, ललितपुर र भक्तपुरको जिल्लामा समाजवादी पार्टीको नेतृत्व चयन गरेको छ । काठ श्यामकृष्ण प्रजापति, सनोज महत, श्याम शिल्पकार अध्यक्षमा चयन भएको समाजवादी पार्टीका महासचिव गंगा श्रेष्ठले जानकारी दिए ।श्रोत साझा पोस्ट
