कोकिन सेवन गरी आफ्नै श्रीमति र २ छोरीको हत्या गर्ने व्यक्तिलाई विषालु इन्जेक्शन दिएर मारियो
एजेन्सी, २४ माघ । अमेरिकाको टेक्सासमा आफ्नै श्रीमति, २ छोरीसहित ५ जनाको गोली हानी हत्या गर्ने व्यक्तिलाई मृत्युदण्ड दिइएको छ ।
बिहीबार ४७ वर्षीय अबेल ओकोआलाई विषालु इन्जेक्शन (सुई)मार्फत् मृत्युदण्ड दिइएको हो । उनलाई हत्या गरेको १७ वर्षपछि मृत्युदण्ड दिइएको अन्तर्राष्ट्रिय समाचार माध्यमले जनाएका छन् ।
अबेललाई टेक्सासको हन्ट्सभिलस्थित मृत्यु च्याम्बरमा विषालु सुई दिइएको थियो । स्थानीय समय अनुसार बेलुका ६ः४८ बजे उनलाई मृत घोषणा गरिएको थियो ।
टेक्सासको फौजदारी न्यायालयले जारी गरेको विज्ञप्तिमा एक इजलासले १७ वर्षपछि हत्या अभियोग पुष्टि भएलगत्तै अबेललाई मृत्युदण्ड दिइएको बताएको छ ।
अबेलले १७ वर्षअघि (सन् २००२ अगस्ट ४ गते) क्र्याक कोकिन सेवन गरेर श्रीमति र छोरीसहित ५ जनाको हत्या गरेका थिए । कोकिनको नशासँगै उनले कोठाभित्र गएर २७ वर्षीया श्रीमति सिसिलिया, ९ महिने छोरी अनाही, ससुरा बार्टोला र साली जेकीको गोली हानी हत्या गरेको अभियोजनाकर्ताले बताएका छन् ।
त्यसपछि अबेलले ९ एमएम रुगर ह्याण्डगन पुनः लोड गरेर ७ वर्षीया छोरी क्रिस्टललाई किचेनमा लखेट्दै लगेर ४ पटक गोली हानेका थिए । त्यस्तै उनले अर्की साली आल्मामाथि पनि गोली प्रहार गरेका थिए । तर आल्मा भने बाँच्न सफल भएकी थिइन् ।
गोली प्रहार गरेलगत्तै अबेलले सिसिलियाको कार चढेर भाग्ने प्रयास गरेका थिए । तर उनलाई सोही क्रममा प्रहरीले रोकेर पक्राउ गरेको थियो ।
अबेलले आफूलाई पक्राउ गर्ने अधिकारीलाई आफूले प्रयोग गरेको बन्दुक घरभित्र टेबलमा रहेको, थप तनाव सामना गर्न नसक्ने र जीवनबाट वाक्क भएको बताएका थिए ।
अदालतका अनुसार अबेलले आफ्नो अपराध स्वीकार गर्दै श्रीमतिले लागू औषधका लागि थप पैसा नदिएको पनि बताएका थिए । हत्या अभियोगमा दोषी ठहरिएपछि उनलाई अदालतले मृत्युदण्डको सजाय सुनाएको थियो ।
विभिन्न प्रान्तीय तथा संघीय अदालतले मृत्युदण्ड रोक्नुपर्ने भन्दै अबेलको पक्षमा दायर भएका पुनरावेदन खारेज गरेका थिए । त्यस्तै बिहीबार मात्रै अमेरिकाको सर्वोच्च अदालतले मृत्युदण्ड रोक्न भन्दै उनले दिएको निवेदन खारेज गरेको थियो ।
यस वर्ष अमेरिकामा मृत्युदण्ड पाउनेमा अबेल तेस्रो व्यक्ति हुन् । त्यस्तै टेक्सासमा मृत्युदण्ड पाउने उनी दोस्रो व्यक्ति हुन् । पश्चिमी मुलुकमा मृत्युदण्ड दिने व्यवस्था अमेरिकामा मात्रै छ ।
धेरै मृत्युदण्ड दिने अमेरिकी राज्यमध्ये टेक्सास पहिलो स्थानमा पर्छ । सन् २०१९ मा टेक्सासमा ९ जनालाई मृत्युदण्ड दिइएको थियो । १९७६ मा अमेरिकाको सर्वोच्च अदालतले मृत्युदण्डको सजायलाई पुनर्स्थापित गरेपछि अन्य राज्यमा भन्दा टेक्सासमा बढी मृत्युदण्ड दिइएको तथ्याङ्कले देखाउँछ ।
एमनेस्टी इन्टरनेशनलका अनुसार बढी मृत्युदण्ड दिने मुलुकमा अमेरिका ७ औं स्थानमा पर्छ । त्यहाँ सन् २०१९ मा २२ जनालाई मृत्युदण्ड दिइएको थियो जुन संख्या २०१८ मा २५ थियो ।श्रोत साझा पोस्ट
