प्रिन्स र कविता उत्कृष्ट
काठमाडौं । ब्याटमिन्टनका प्रिन्स दाहाल र क्रिकेटकी कविता कुँवर प्रथम सुदूरपश्चिम स्पोर्टस् अवार्डमा वर्षको उत्कृष्ट खेलाडी घोषित भएका छन् ।
खेलकुद पत्रकार मञ्च कैलालीले पहिलोपटक आयोजना गरेको अवार्डमा ब्याटमिन्टनका प्रिन्स र क्रिकेटकी कविता उत्कृष्ट खेलाडी घोषित भए । यस्तै वर्षको उत्कृष्ट युवा खेलाडी भारात्तोलनका सागर भण्डारी भए । उनले सुदूरपश्चिम प्रदेशलाई भारात्तोलनमा २२ वर्षपछि स्वर्ण पदक दिलाएका थिए ।
स्पेसल अवार्ड कैलाली जिल्ला खेलकुद विकास समितिका निवर्तमान अध्यक्ष दीपक सिंहलाई प्रदान गरियो । ३ वर्षे कार्यकालमा खेलकुदको विकासमा महत्त्वपूर्ण योगदान दिएको भन्दै उनलाई स्पेसल अवार्डबाट सम्मान गरिएको हो ।
लाइफ टाइम एचिभमेन्ट अवार्ड श्यामसुन्दर शर्मालाई प्रदान गरियो । उनले क्रिकेट र फुटबलमा लामो समय योगदान दिएका थिए । अवार्ड विजेता खेलाडीलाई नगद र ट्रफी प्रदान गरिएको थियो ।
