जावलाखेल युथ क्लब अपराजित ,२ मिनेटभित्र २ गोल
काठमाडौँ । शहीद स्मारक ए डिभिजन लिग फुटबलअन्तर्गत यो सिजन जावलाखेल युथ क्लबले अपराजित यात्रा कायमै राखेको छ। सातदोबाटोस्थित एन्फा कम्प्लेक्समा मंगलबार भएको खेलमा जावलाखेलले च्यासल युथ क्लबलाई २-० गोलले हरायो।
जावलाखेलका रुपबहादुर लामा र विजय घलानले एक एक गोल गरे। खेलको अन्तिम १० मिनेटमा जावलाखेलले दुवै गोल गरेको थियो। ८० औँ मिनेटमा रुपबहादुर र ८२ औँ मिनेटमा विजयले गोल गरे।
चार खेल खेलेको जावलाखेलको २ जित र २ बराबरीको नतिजासहित ८ अंक जोडेर तेस्रो स्थानमा छ। शीर्षस्थानमा रहेको मनाङ मर्स्याङ्दीको ४ खेलबाट १० अंक छ। दोस्रो स्थानमा रहेको मच्छिन्द्र क्लबको चार खेलबाट ९ अंक छ।
च्यासलको चार खेलबाट चार अंक छ। उसले लगातार दोस्रो खेलमा हार ब्यहोरेको हो।
