बुटवलद्वारा विराटनगरलाई १३४ रनको लक्ष्य
पोखरा । दोस्रो संस्करणको पोखरा प्रिमियर लिग क्रिकेट (पीपीएल)अन्तर्गत बुटवल ब्लास्टर्स र विराटनगर टाइटन्सले अन्तिम लिग खेल्दै छन् । पोखरा रंगशालामा टस हारेर पहिले ब्याटिङ गरेको बुटवलले विराटनगरलाई १३४ रनको लक्ष्य दिएको छ ।
बुटवलले निर्धारित २० ओभरमा ८ विकेट गुमाएर १ सय ३३ रन बनायो । बुटवलका हर्ष टंकले अर्धशतकीय पारी खेले । ४४ बलको सामना गरेका उनले ६ चौका र ५ छक्काको सहयोगमा ६७ रन बनाए ।
यस्तै शिवम् सिंहले ३७ र कप्तान सिद्धान्त लोहनीले ११ रन बनाए । बलिङतर्फ विराटनगरका जैद आलमले सर्वाधिक ४ तथा किशोर महतोले २ विकेट लिए ।
यसअघि नै प्ले अफमा स्थान बनाइसकेको बुटवललाई अन्तिम खेलको नतिजाले फरक पार्ने छैन । तर अन्तिम खेलमा फराकिलो जित निकाल्दै प्ले अफमा पुग्ने सम्भावना विराटनगरलाई अझै छ ।
