दुई जना सहकर्मीको हत्या पछि आत्महत्या
एजेन्सी । बुधबार अमेरिकाको हवाइ द्धिपमा भएको गोली काण्डमा ३ जनाको ज्यान गएको छ ।
हवाइ द्धिपको होनोलुलु नजिकै रहेको अमेरिकी सैन्य शिविरमा एक पानी जहाजचालकले गोली प्रहार गरी २ जना सहकर्मीको हत्या गरेका हुन् । गोली लागेर अर्का एकजना सहकर्मी गम्भीर घाइते भएको बिबिसीले जनाएको छ । घाइतेको अवस्था स्थिर रहेको जनाइएको छ ।
आफ्ना सहकर्मीलाई गोली प्रहार गरेपछि ती चालकले आफैंलाई गोली हानी आत्महत्या गरेका थिए । गोली प्रहार गर्ने चालक र मृतकको नाम खुलाइएको छैन ।
अधिकारीहरुले २ जना मृतक रक्षामन्त्रालयका कर्मचारी रहेको बताएका छन् । गोली प्रहार गर्ने चालक युएसएस कोलम्बिया नामक पनडुब्बीका चालक रहेको उनीहरुको भनाइ छ ।
घटनालगत्तै पर्ल हार्बरस्थित अमेरिकी सैन्य शिविर केही समय बन्द गरिएको थियो । हाल घटनाबारे अनुसन्धान भइरहेको छ ।
पर्ल हार्बरमा अमेरिकी जल तथा हवाइ सेनाको अखडा छ । जापानले दोस्रो विश्वयुद्ध ताका उक्त अखडामा आक्रमण गर्दा २ हजार ३ सय अमेरिकीको ज्यान गएको थियो । उक्त आक्रमणपछि अमेरिकाले औपचारिक रुपमा जापानविरुद्ध युद्ध घोषणा गरेको थियो ।
जापानी आक्रमणको ७८ औं वर्षगाँठको ३ दिन पहिला पर्ल हार्बरमा गोली काण्ड भएको हो ।
