सिक्किममा चामलिंगकाे पार्टी एसडीएफका १० विधायक भाजपा प्रवेश
सिक्किम । सिक्किमका पूर्वमुख्यमन्त्री पवन कुमार चामलिंगको पार्टी सिक्किम डेमोक्रेटिक फ्रन्ट (एसडीएफ)का १० विधायक मंगलबार भाजपामा प्रवेश गरेका छन् । भाजपाका कार्यकारी अध्यक्ष जेपी नड्डा र पार्टी महासचिव राम माधवले विधायकहरुलाई स्वागत गरे ।
२५ वर्षसम्म निरन्तर सिक्किममा सत्ता चलाएका चामलिंगको पार्टी एसडीएफका १५ विधायक थिए । जसमध्ये १० विधायक भाजपा प्रवेश गरेसँगै सिक्किमको सबैभन्दा लामो इतिहास बोकेको ठुलो पार्टी नै गम्भिर संकटमा पुगेको छ । कानूनत दुई तिहाई विधायक अन्य पार्टीमा प्रवेश गरेमा पार्टीको अधिकार र अस्थित्वमाथि नै प्रश्न उठ्छ ।
पछिल्लो लोकसभा चुनावमा पनि पवनको पार्टीले नराम्रो नतिजा ल्याएको थियो । चामलिंग नेतृत्वको पार्टीलाई केहि वर्षअगाडि गठन भएको सिक्किम क्रान्तिकारी पार्टी (एसकेएम) ले हराएको थियो । विधानसभामा ३२ सिटमध्ये १७ सिट एसकेएम र १५ सिट एसडीएफले पाएको थियो । चुनावी नतिजासँगै एसकेएम नेतृत्वमा प्रेम सिंह तामाङ सिक्किमका मुख्यमन्त्री बनेका छन् ।
पवन कुमार चामलिंग सन् १९९४ देखि २०१९ सम्म निरन्तर सिक्किमका मुख्यमन्त्री बनेका थिए । ६८ वर्षका चामलिंग भारतकै सबैभन्दा बढि (२५ वर्षसम्म) मुख्यमन्त्री बनेका एकमात्र नेता हुन् । तर गत चुनावमा उनको पार्टीले नराम्रो हार बेहोरेको थियो ।
सिक्किममा पनि भाजपाको सरकार : भाजपा महासचिव
भाजपा महासचिव राम माधवले सिक्किममा भाजपाको उपस्थिति बलियो हुँदै गएको भन्दै क्षेत्रीय दलसँगको निर्भरता हट्ने बताएका छन् । विधायकहरुलाई पार्टी प्रवेश गराएसँगै माधवले सिक्किममा सरकार बनाउनको लागि बाटो खुल्ला हुँदै गरेको पनि बताए ।
खबरडबलीबाट
