प्रचण्ड परिवारसहित गए यूएइ, ओलीकाे सिंगापुर जाने तयारी
काठमाडौं । सत्तारुढ दल नेपाल कम्युनिस्ट पार्टी (नेकपा) का अध्यक्ष एवं पूर्वप्रधानमन्त्री पुष्पकमल दाहाल प्रचण्ड युएई प्रस्थान गरेका छन् ।
पुष्पकलम दाहाल मंगलबार बिहान पत्नी सीता, छोरीहरु रेणु दाहाल र गंगा दाहालसहित युएई प्रस्थान गरेका हुन् । लामो समयदेखि बिरामी पत्नी सीताको इच्छा अनुसार प्रचण्ड परिवार युएई उडेको हो ।
नेकपाका अध्यक्षसमेत रहेका प्रचण्डले ५ दिने युएई भ्रमणका क्रममा कुनै पनि राजनीतिक भेटघाट नगर्ने भएका छन् । नेकपा अध्यक्ष प्रचण्डले सोमबार बसेको पार्टी सचिवालय बैठकमा आफ्नो यूएई भ्रमणबारे जानकारी गराएका थिए ।
त्यस्तै प्रधानमन्त्री एवं अर्का अध्यक्ष केपी शर्मा ओली समेत विदेश भ्रमणको तयारीमा छन् । स्वास्थ्यमा समस्या देखिएपछि उपचारका लागि आउँदो साउन १८ गते प्रधानमन्त्री ओली सिंगापुर जान लागेका हुन् ।
प्रधानमन्त्री ओलीले १० दिन सिंगापुरमा उपचार गराउने सचिवालय स्रोतले जनाएको छ ।
