जनमत र नाउपाबिच एकता सहमति: अध्यक्षमा राउत, सहअध्यक्षमा श्रेष्ठ, पार्टीको नाम ‘नागरिक जनमत’

काठमाण्डाेँ । जनमत पार्टी र नागरिक उन्मुक्ति पार्टी (नाउपा) बीच एकता प्रक्रिया औपचारिक रूपमा टुंगिएको छ। एकीकृत पार्टीको अध्यक्ष सिके राउत, सहअध्यक्ष रन्जिता श्रेष्ठ र संरक्षक रेशम चौधरी रहने सहमति भएको छ। नयाँ पार्टीको नाम ‘नागरिक जनमत पार्टी’ राखिने र चुनाव चिह्न नाउपाले अहिले प्रयोग गर्दै आएको ‘ढकिया’ रहने तय भएको छ।

नाउपाका उपमहासचिव राजन गुरुङका अनुसार एकीकृत पार्टीको औपचारिक घोषणा १० दिनभित्र गरिनेछ। उनले भने, “एकीकरणको प्रक्रिया टुंगिसकेको छ र अब प्रतिवेदन बुझाएर एकता घोषणा गर्ने प्रक्रिया सुरु हुनेछ।”

पार्टीको नाम ‘नागरिक जनमत पार्टी’ राख्दा दुवै पार्टीको नामको प्रतिनिधित्व हुनेछ, जसले एकता प्रक्रियालाई सहज बनाएको छ। जनमत पार्टीले अहिले ‘हर्न’ चुनाव चिह्न प्रयोग गर्दै आएको छ भने, नाउपाले ‘ढकिया’ चुनाव चिह्न प्रयोग गरेको छ। जनमत पार्टीका एक नेताले भने, “हामीले हाम्रो चुनाव चिह्न हर्न छाड्न तयार भएका छौं, किनकि एकीकृत पार्टीको अध्यक्ष पनि जनमत पार्टीका अध्यक्ष हुने सहमति भएको छ।”

दुवै पार्टीले एकीकरणको ढाँचा तयार गर्न कार्यदल गठन गरेका छन्। नाउपाले गंगाराम चौधरी, रामलाल थारु र सुनिता चौधरीलाई कार्यदलमा राखेको छ भने जनमत पार्टीले अब्दुल खान, शरत्सिंह यादव र बालगोविन्द चौधरीलाई समावेश गरेको छ। यो कार्यदलले तीन दिनभित्र एकीकरणको रूपरेखा तयार गरी प्रतिवेदन बुझाउने छ।

सुरुमा रन्जिता श्रेष्ठ अध्यक्ष पद छाड्न तयार थिइनन्। तर, संरक्षक रेशम चौधरीलगायतका नेताहरूको दबाबपछि उनले सहअध्यक्ष पद स्वीकार गर्न स्वीकार गरिन्। नाउपामा रेशम र रन्जिताबीचको विवाद लामो समयदेखि रहेको थियो, जसले पार्टी विभाजनको स्थितिमा पुर्याएको थियो।

एकीकरणपछि जनमत र नाउपा तराई/मधेसमा केन्द्रित एक प्रमुख दलको रूपमा उभिनेछन्। जनमत पार्टीले हाल प्रतिनिधिसभामा ६ जना सदस्य पठाएका छन् भने नाउपाका ४ सदस्य छन्।