फुटेका माओवादी एक हुन मैले के गर्न पर्ने हाे म गर्छु: प्रचण्ड

चितवन । नेकपा माओवादी केन्द्रका अध्यक्ष पुष्पकमल दाहाल प्रचण्डले माओवादी समूहहरुको एकतामा जोड दिँदै त्यसका लागि आफूले गर्नुपर्ने सबै गर्न तयार रहेको बताएका छन् ।

तराई–मधेश जागरण अभियानअन्तर्गत आज(शनिबार) चितवनको भरतपुरमा आयोजित कार्यक्रमलाई सम्बोधन गर्दै उनले माओवादीहरुको एकतामा जोड दिएका हुन् । ‘माओवादीहरु सबै एक हुन्छन् अब । त्यसमा तपाईँहरु शंका गर्नुपर्दैन । सबै आउनुको कुनै विकल्प नै छैन । उनले भने, मैले त्यसको निम्ति के कति गर्नुपर्ने हो, सबै गर्छु मैले । यो देशमा हामीले अर्को असाधारण रिकर्ड बनाउनुपर्छ।’

प्रचण्डले २०८४ को निर्वाचनबाट भ्रष्टाचारी, दलाल, बुर्जुवाहरु, विचौलिया, भूमाफियाहरुको दिन सकिने दाबी समेत गरे ।

‘२०८४ मा सबै एक भएर सबैले मेहनत गर्यौं भने यी भ्रष्टाचारी, दलाल, बुर्जुवाहरु, विचौलिया, भूमाफियाहरुको दिन सकिन्छ,’ उनले भने, ’जनताको असली राज आउँछ भन्ने म तपाईँहरूमाझ विश्वास व्यक्त गर्न चाहन्छु। हामी सबै एकचोटी एकतावद्ध भएर अगाडि जाने हो।’
जनताले आफूबाट धेरै आश गरेको पनि उनको दाबी छ ।