बागमती विश्वविद्यालयको डिनमा डा. विश्वकर्मा

हेटाैँडा । बागमती प्रदेश विश्वविद्यालयको कानुन तथा व्यवस्थापन संकायको डिनमा डा. गंगाराम विश्वकर्मा नियुक्त भएका छन्।

डिन सिफारिस समितिको सिफारिसमा बुधबार विश्वविद्यालयको बोर्ड अफ ट्रस्टका अध्यक्षले डा. विश्वकर्मालाई कानुन र व्यवस्थापन संकायको डिन नियुक्त गरेका हुन्। उनलाई तत्काल लागू हुने गरी नियुक्त गरेको विश्वविद्यालयका उपाध्यक्ष डा. कुसुमराज सुवेदीले जानकारी दिए।

व्यवस्थापन र कानुन संकायको शैक्षिक कार्यक्रम, अनुसन्धान पहल र प्रशासनिक कार्यहरुको निरीक्षण गर्ने गरी उनको जिम्मेवारी तोकिएको डा. सुवेदीले बताए। उनको भूमिका शिक्षाको गुणस्तर बढाउने, नवप्रवर्तन, अनुसन्धानलाई बढावा दिने र संकायभित्र सामुदायिक संलग्नतालाई सुदृढ गर्ने हुनेछ।

विश्वविद्यालयले गत फागुन ११ मा डिन नियुक्तिका लागि सार्वजनिक सूचना आह्वान गरेको थियो। प्रदेश उच्च शिक्षा ऐन, २०७८ तथा नियमावली, २०७९ संशोधनसहित प्रदेश विश्वविद्यालयको विधान, २०८१ र बागमती प्रदेश विश्वविद्यालयको डिन सिफारिससम्बन्धी मापदण्ड, २०८१ अनुसार आवेदन माग गरिएको थियो।

सो सूचनाको आधारमा पेस भएका निवेदनबाट पाँचजनाको नाम सर्टलिस्ट गरेर छनाेट गरिएको डा. सुवेदीले जानकारी दिए।

नयाँ पत्रिकाबाट