सकियाे हेटाैँडाकाे निर्माण तथा व्यापार महोत्सव, ६ करोडको कारोबार
हेटाैँडा । निर्माण व्यवसायी संघ मकवानपुरले औद्योगिक शान्ति नेपाल संस्थासँगको सहकार्यमा हेटौंडामा आयोजना गरेको दोस्रो राष्ट्रिय निर्माण तथा व्यापार महोत्सव आइतबार समापन भएको छ।
फागुन ६ गतेबाट हेटौंडाको टीसीएन चौरमा सुरु भएको महोत्सवमा एक लाखभन्दा बढी दर्शकले अवलोकन गरेका छन् भने ६ करोड रुपैयाँ बराबरको कारोबार भएको आयोजकले जानकारी दिएको छ।
निर्माण व्यवसायी संघ मकवानपुरका अध्यक्ष बालगोपाल कंडेलको अध्यक्षतामा सम्पन्न समापन समारोहमा प्रमुख अतिथिका रूपमा नेपाल निर्माण व्यवसायी महासंघका अध्यक्ष रवि सिंह उपस्थित थिए।
अध्यक्ष कंडेलले महोत्सव सफल बनाउन सबैको साथ सहयोग रहेको भन्दै धन्यवाद व्यक्त गरे। उनले महोत्सवबाट बचेको रकम संघको नयाँ भवन निर्माणमा प्रयोग गरिने प्रतिबद्धता जनाए।
समापन कार्यक्रममा बागमती प्रदेशसभा सदस्य एकलाल श्रेष्ठ, प्रमुख जिल्ला अधिकारी स्कीम श्रेष्ठ, नेपाली कांग्रेस मकवानपुरका सचिव ईश्वर पाठक, हेटौंडा वडा नम्बर ११ का अध्यक्ष जुना दाहाललगायत विभिन्न क्षेत्रका व्यक्तित्वहरूले मन्तव्य व्यक्त गरेका थिए।
नयाँ प्रविधि र सामग्रीको प्रदर्शनी
महोत्सवमा निर्माण क्षेत्रमा प्रयोग हुने अत्याधुनिक उपकरण तथा सामग्रीको प्रदर्शनी, दैनिक उपभोग्य वस्तुहरू, सूचना प्रविधि, सामुन्द्रिक माछाहरूको वृहत् प्रदर्शनी, बहुराष्ट्रिय कम्पनीका उत्पादनहरूको विक्री तथा मनोरञ्जनात्मक बाल उद्यानजस्ता कार्यक्रमहरू राखिएका थिए।
आयोजकका अनुसार महोत्सवले निर्माण सामग्री उत्पादक, विक्रेता र उपभोक्ताबीच सोझो सम्पर्क स्थापित गरी व्यवसाय वृद्धिसँगै गुणात्मक प्रतिस्पर्धालाई प्रोत्साहन गरेको छ।
निर्माण व्यवसायी प्रताडित छन् : अध्यक्ष सिंह
महासंघका अध्यक्ष रवि सिंहले निर्माण व्यवसायीहरू अहिले प्रताडित अवस्थामा रहेको बताए। उनले निर्माण सामग्रीको अस्वाभाविक मूल्यवृद्धि तथा काम गरेबापतको भुक्तानी नपाउँदा व्यवसायीहरू मारमा परेको बताए।
“एकातिर काम गरेको पैसा पाउन नसकिएको छ, अर्कोतिर निर्माण सामग्रीको मूल्यवृद्धिले थप समस्या सिर्जना गरेको छ,” उनले भने। “निर्माण सामग्रीमा कृत्रिम अभाव सिर्जना गरेर मूल्यवृद्धि गरिएको छ। राज्यले यसतर्फ गम्भीर ध्यान दिन आवश्यक छ।”
सिंहले स्रोतको सुनिश्चितता बिना नै निर्वाचन क्षेत्र लक्षित योजना ल्याउने प्रवृत्तिले पनि समस्या थपिएको आरोप लगाए। उनले महोत्सवले लुकेका प्रतिभाहरूलाई अवसर प्रदान गरेको र निर्माण व्यवसायीहरू सामाजिक उत्तरदायित्वमा पनि सक्षम रहेको दाबी गरे।
