शान्तिटोलको सप्ताहमा २९ लाख रुपैयाँ भन्दा बढी रकम संकलन

हेटौंडा । हेटौंडा-६ मा रहेको शान्तिटोल ट‍ोल विकास संस्थाको आयोजनामा फागुन ७ गतेदेखि शुरू भएको श्रीमद भागवत सप्ताह ज्ञान महायज्ञमा २९ लाख रुपैयाँ भन्दा बढी रकम संकलन भएर सकिएको छ ।

महायज्ञ समापनसम्ममा  २९ लाख ९ हजार १४६ रूपैयाँ  संकलन भएको हो । महायज्ञ समुद्घाटनको दिन २८ हजार ३५५ रूपैयाँ, कथा शुभारम्भको पहिलो दिन १ लाख १ हजार ७५८ रूपैयाँ, दोस्रो दिन १ लाख ३८ हजार १०५ रूपैयाँ र तेस्रो दिन शनिबार ४ लाख ४३ हजार ७३१ रूपैयाँ संकलन भएको छ ।

त्यस्तै, चौथो दिन आइतबार ३ लाख १४ हजार ७३२ रूपैयाँ, पाँचौ दिन सोमबार ५ लाख ३१ हजार ८२५ रूपैयाँ, छैठौं दिन मंगलबार ५ लाख १३ हजार ४०७ रूपैयाँ, सातौं दिन बुधबार ५ लाख २३ हजार १०५ रूपैयाँसहित २६ लाख ४१ हजार १३२ रूपैयाँ संकलन भएको कोषाध्यक्ष पूर्णभद्र चौलागाईंले बताए ।

त्यस्तै, महायज्ञको अन्तिम दिन बिहीबार १ लाख १७ लाख ७७९, दानपेटिकाबाट ३० हजार २३५, भुक्तानी लिन बाँकी ४६ हजार ११४ रूपैयाँ र कलशबाट १ लाख २० हजार रूपैयाँ दान रकम संकलन भएको छ ।

शान्तिटोलमा रहेको विपी गणेशमान स्मृति शान्ति पार्कमा राधाकृष्ण मन्दिर एवं ज्येष्ठ नागरिक भवन निर्माणका लागि फागुन ७ गतेदेखि १५ गतेसम्म सप्ताह ज्ञान महायज्ञ आयोजना गरिएको महायज्ञ मूल समारोहका संयोजक केशव धितालले जानकारी दिए ।

कार्यक्रममा हेटौंडा-६ वडा ज्येष्ठ नागरिक मञ्चका अध्यक्ष बासुदेव सापकाेटा, कामधेनु बहुद्धेश्यीय सहकारीका अध्यक्ष उदय विडारी, सामुदायिक वन उपभोक्ता महासंघका केन्द्रीय सदस्य रामहरी चौलागाईं, महायज्ञका कोषाध्यक्ष पूर्णभद्र चौलागाईं लगायतले मन्तव्य गरेका थिए । कार्यक्रममा राजनीतिक दल, टोल विकास संस्था, सामाजिक संघसंस्था लगायतका प्रतिनिधिहरूको उपस्थिति रहेको थियो ।