मकवानपुरमा अफिम र गाँजाको धुलोसहित २ जना पक्राउ

हेटौँडा । मकवानपुर प्रहरीले ठुलो मात्रामा लागुऔषध अफिम, गाँजा र गाँजाको धुलो (चलचल्तीको भाषामा पोल्याण्ड) बरामद गरेको छ ।

मकवानपुर प्रहरीले सिट मुनि लुकाई राखेको बा ७ च ७०१८ नम्बरको सुमोबाट लागू औषध गाँजा ३१ किलो ५६० ग्राम बरामद गरेको हो ।
त्यसैगरि लागुऔषध अफिम ६ किलो १६० ग्राम र गाँजाको धुलो (पोल्याण्ड) १२७ किलो ९४० ग्राम बरामद गरेको हो । फरार रहेका उक्त सुमोका चालक बाह्रबिसे ( सिन्धुपाल्चोकका ३८ वर्षिय लाल बहादुर तामाङलाई काठमाण्डौ उपत्यका अपराध अनुसन्धान कार्यालय टेकुको समन्वयमा गोकणेश्वर ४ जोरपाटीबाट पक्राउ गरि इलाका प्रहरी कार्यालय मनहरीमा ल्याईएको मकवानपुरका प्रहरी प्रवक्ता प्रहरी नायब उपरिक्षक श्यामु अर्यालले जानकारी दिए ।

यसैगरि प्रहरीले हेटौँडा ३ बसामाडीस्थित पुर्व पश्चिम लोकमार्ग सडकखण्डमा यात्रुबाहक बसबाट मनहरी ३ हाँडीखोला बस्ने ४४ वर्षिय दिपक ओझाले झोला भित्र लुकाइ राखेको औषध गाँजा ११ किलो ४२० ग्राम समेत बरामद गरेको छ । सबै घटनाको आवश्यक कारवाही तथा अनुसन्धान भइरहेको मकवानपुर प्रहरी प्रमुख बिश्वराज खड्काले जानकारी दिए ।