मकवानपुरमा ठूलो परिमाणमा लागूऔषध सहित एक युवा र युवती पक्राउ

हेटौँडा । मकवानपुर प्रहरीले ठूलो परिमाणमा लागूऔषधसहित दुईजनालाई पक्राउ गरेको छ । पक्राउ पर्नेमा भक्तपुर जिल्लाको चाँगुनारायण नगरपालिका–८ का २६ वर्षीय प्रेमप्रसाद दाहाल र २२ वर्षीय निकिता पुडासैनी रहेको मकवानपुर प्रहरीले जनाएको छ । उनिहरुलाई हेटौँडाबाट पक्राउ गरेको हो । शनिबार बिहान ९ः१५ बजेको समयमा हेटौँडा–१५, रातोमाटेस्थित प्रहरी चेकपोष्टबाट उनीहरुलाई एक हजार एक सय ८९ ट्याब्लेट लागूऔषध नाइट्रोभेटसहित पक्राउ गरिएको प्रहरी कार्यलयले जनाएको छ ।

ना ६४ प ३१७६ नम्बरको स्कुटरमा प्रेम र निकिता बीरगन्जबाट काठमाडौंतर्फ जाँदै गर्दा उनीहरुलाई रोकेर सुरक्षाजाँच गर्ने क्रममा प्रहरीले लागूऔषध बरामद गरेको जनाएको छ । उनिहरुलाई जिल्ला अदालत मकवानपुरबाट ७ दिनको म्याद थप गरी हिरासतमै राखेर अनुसन्धान गरिरहेको मकवानपुरका प्रहरी प्रवक्ता प्रहरी नायव उपरीक्षक श्यामु अर्याले बताउनु भयो ।

प्रेम र निकिता लागूऔषध प्रयोगकर्ता हुनुका साथै लागूऔषधको कारोबारनै गर्ने गरी यति ठूलो परिमाणमा तस्करीको प्रयास गरिएको देखिएको प्रवक्ता अर्यालले बताउनुभयो । छिमेकी मुलुक भारतको सीमा क्षेत्र रक्सौलबाट लागूऔषध प्रयोगकर्ता तथा कारोबारीले लागूऔषध तस्करी गर्ने गरेका छन् । रक्सौलबाट हेटौँडा हुँदै राजधानी काठमाडौंसहित देशका प्रमुख सहरमा लागूऔषध तस्करी हुने गरेको अर्यालले बताउनु भयो ।