स्वर्गीय अनुपम स्मृति युथ १६ मा तीन टोली अन्तिम चारमा प्रवेश

हेटाैँडा । स्वर्गीय अनुपम घलान स्मृति यू–१६ नx गरस्तरीय फुटबल प्रतियोगिताअन्तर्गत् विहीबार भएको खेलमा हेटौंडाका वडा नम्बर १२, १५ र १९ नम्बर वडा विजयी भएका छन् । विजयी तीनवटै टोली अन्तिम चारमा प्रवेश गरेका छन् ।

हेटौंडा–१५ ले ६ नम्बर वडालाई टाइब्रेकरमा ५–४ गोलअन्तरले पराजित गरेको हो । निर्धारित समय १–१ गोलको बराबरीमा टुंगिएपछि खेलमा टाइब्रेकर भएको थियो । यस खेलमा हेटौंडा–६ का अनुज राई म्यान अफ दी म्याच घोषित भए । राईले निर्धारित समयको २५ औं मिनेटमा गोल गर्दै टोलीलाई अग्रता दिलाएका थिए । १५ नम्बरका लागि ३८ औं मिनेटमा असिम वाइवाले गोल गर्दै खेललाई बराबरीमा ल्याएका थिए । टाइब्रेकरमा ६ नम्बरको तर्फबाट नितेश राई, अनुज राई, लिसेन गुरुङ, संगम चौलागार्इंले गोल गरेका थिए । १५ नम्बरका लागि टाइब्रेकरमा रेहान घलान, नविन लो, प्रज्ज्वल लामा, कविर वाइबा र रोहित डिम्डुङले गोल गरे ।

दोस्रो खेलमा हेटौंडा–१२ ले हेटौंडा–९ लाई ३–१ गोलअन्तरले पराजित गरेको थियो । हेटौंडा–१२ को तर्फबाट २५ औं मिनेटमा आदित्य मोक्तान, ५३ औं मिनेटमा उर्गेन रुम्बा र दोस्रो हाफको थप समयमा आदित्य मोक्तानले गोल गरेका थिए । खेलमा विजयी टोलीका आदित्य मोक्तान म्यान अफ दी म्याच घोषित भए ।

विहीबार तेस्रो खेलमा हेटौंडा–१९ ले ८ नम्बर वडालाई टाइब्रेकरमा पराजित गरेको हो । हेटौंडा–८ का लागि सन्देश देउलाले गोल गर्दै टोलीलाई अगाडि बढाएका थिए । हेटौंडा–१९ का लागि पेम्वा बलले गोल गरेका थिए । निर्धारित समयमा बराबरी भएपछि गरिएको पेनाल्टि सुटआउटमा हेटौंडा–१९ ले ८ नम्बरलाई ४–३ गोलअन्तरले पराजित गरेको हो ।

नगर खेलकुद विकास समितिको आयोजनामा जारी प्रतियोगिताअन्तर्गत् शुक्रबार दुईवटा सेमिफाइनल खेल हुनेछ । प्रतियोगिता फाइनल शनिबार हुनेछ । प्रतियोगितामा नगरका वडाहरुको सहभागिता रहेको समितिका अध्यक्ष रविन्द्र घिमिरेले प्रदेश दैनिकलाई जानकारी दिए ।