बर्सेनि हजारौँ महिलाहरू पाठेघरको मुखको क्यान्सरबाट प्रभावित : मुख्यमन्त्री लामा
हेटाैँडा । बागमती प्रदेशका मुख्यमन्त्री बहादुरसिंह लामाले नेपालमा बर्सेनि हजारौँ महिलाहरू पाठेघरको मुखको क्यान्सरबाट प्रभावित भइरहेको बताएका छन् ।
मुख्यमन्त्री लामाले पाठेघरको मुखको क्यान्सर अहिलेकाे समयमा चुनौतीका रूपमा रहेकाले यस्ता प्रकारका जुनसुकै रोगहरु लुकाएर राख्ने हाेइन उपचार गराउने तर्फ लाग्न आग्रह गरेका छन् ।
मुख्यमन्त्री लामाले महिलाहरुले राेग लुकाउने कुरा आफैले गाउँमा शिविर लैजाने क्रममा देखेकाे स्मरण गराउँदै उहाँले रोगलाई नलुकाइ उपचारमा लाग्न सके याे र यस्ता राेग निर्मूल पार्न सकिने बताए ।
बागमती प्रदेश स्वास्थ्य मन्त्रालय प्रादेशिक निर्देशनालयले आज मकवानपुरको हेटौँडा–१० स्थित ज्ञानदा माध्यमिक विद्यालयबाट प्रादेशिक स्तरकाे एचपिभी खोप अभियानको उद्घाटन गर्दै मुख्यमन्त्री लामाले यस अभियानले नेपालमा दैनिक चारजना महिलाले पाठेघरको मुखको क्यान्सरबाट मृत्युवरण गर्नुपरेको दुखद अवस्थालाई नियन्त्रण गर्न तीन तहको सरकारको समन्वयमा एचपिभी खोप अभियान सुरु गरिएको र यसले अधिकतम लाभ मिल्छ भन्ने उहाँको भनाइ थियो ।
कार्यक्रममा प्रदेशका स्वास्थ्यमन्त्री किरण थापाले नेपालमा नसर्ने रोगबाट मृत्यु हुने दर बढ्दो रहेको बताउनुभयो । उहाँले ७० प्रतिशत मानिसको नसर्ने रोगबाट मृत्यु भइरहेको बताउँदै नसर्ने रोगको क्षति रोक्नुपर्ने चुनौती रहेको बताउनुभयो ।
जिल्ला समन्वय समिति मकवानपुरका प्रमुख ललित घलानकाे अध्यक्षतामा भएकाे कार्यक्रममा प्रदे्शका आन्तरिक मामिला मन्त्री, सहकारी मन्त्री, हेटाैँडा उपमहानगरका मेयर, वडा अध्यक्ष, स्वास्थ्य मन्त्रालयका महाशाखा प्रमुख, प्रदेश स्वास्थ्य सचिव, निर्देशनालयका निर्देशक ,मकवानपुरका प्रमुख जिल्ला अधिकारी, प्रहरी प्रमुख, अर्वुद्ध राेग निवारण संघ संस्थाका प्रतिनिधिलगायत शिक्षक विद्यार्थीहरुकाे सहभागिता रहेकाे थियाे ।
