हेटौंडामा राष्ट्रिय युवा कविता उत्सव–२०८१ सम्पन्न

हेटौंडा । बागमती प्रदेश सरकार मातहतको प्रदेश युवा परिषद् र साहित्य संगम मकवानपुरको सहकार्यमा आयोजित राष्ट्रिय युवा कविता उत्सव–२०८१ हेटौंडामा सम्पन्न भएको छ। उक्त प्रतियोगितामा कास्कीका संयोग बस्याल प्रथम हुँदै नगद ४० हजार रुपैयाँ हात पार्न सफल भएका छन्। उनले ‘सावधान’ शीर्षकको कविता वाचन गरेर निर्णायकहरूको मन जितेका थिए।

प्रतियोगितामा कास्कीका सुदर्शन पौडेलले ‘घर नफर्किएको छोराको सम्झनामा’ शीर्षकको कवितासँग द्वितीय स्थान हासिल गर्दै नगद ३० हजार रुपैयाँ पुरस्कार प्राप्त गरे। त्यसैगरी, उदयपुरकी सुमि पोखरेलले ‘समय दर्शक यन्त्रको पर्दा नियाल्दा’ शीर्षकको कवितासँग तृतीय स्थान हासिल गर्दै २० हजार रुपैयाँ प्राप्त गरिन्।

बझाङका महेश कठायतले ‘देश’ शीर्षकको कविताका लागि सान्त्वना पुरस्कार स्वरूप नगद १० हजार रुपैयाँ प्राप्त गरे।

यस पटकको कविता उत्सवका लागि देशभरबाट २ सय २३ कविता प्राप्त भएका थिए। तीमध्येबाट उत्कृष्ट २० कविताको सूची तयार पारिएको थियो। शनिबार आयोजित कार्यक्रममा छनोटमा परेका कविहरूले आफ्ना कविताहरू वाचन गरेका थिए।
प्रतियोगितामा पर्वतका तारानाथ पराजुली र संखुवासभाका सिजन श्रेष्ठ भने कार्यक्रममा सहभागी हुन सकेनन्।

कार्यक्रममा प्रदेश युवा परिषद्का कार्यकारी उपाध्यक्ष सन्तोष चौलागाईंको अध्यक्षता तथा बागमती प्रदेशका युवा तथा खेलकुद मन्त्री मीनप्रसाद महर्जनको प्रमुख आतिथ्य रहेको थियो।
कार्यक्रमलाई सम्बोधन गर्दै मन्त्री महर्जनले देशभित्रै युवालाई अवसर र सम्भावना प्रदान गर्नतर्फ सरकार प्रतिबद्ध रहेको बताए। उनले भने, “हामीले युवाहरूको सीप र क्षमतालाई राष्ट्र निर्माणमा लगाउनुपर्छ। विदेशिने युवालाई देशमै रोजगारी र अवसर सिर्जना गरेर रोक्नुपर्छ।”

कार्यक्रममा चर्चित कवि मोमिला जोशीको एकल कविता वाचन विशेष आकर्षण बन्यो। उनले ‘भाव समर्पण’, ‘प्रेम’, ‘पीडा’, ‘प्यास र पानी’, ‘सूर्य समय’, ‘एउटा लालीगुराँस हराएको बेला’, ‘मात्र एउटा हाँगा काटिने’, ‘दोभन प्रहारबाट’, ‘नगरबधुको वक्तव्य’, ‘हिउँदको प्रथम वर्षात्’, ‘उकालोमा मेरो तस्बिर’, ‘तिमी र म’, ‘भीमसेन थापाको सुसाइड नोट’ शीर्षकका कविता वाचन गरेर उपस्थित सबैलाई भावविह्वल तुल्याइन्।

कार्यक्रममा युवा तथा खेलकुद मन्त्रालयका सचिव बद्रीनाथ गैरे, प्रदेश युवा परिषद्का कार्यालय प्रमुख रमेश घिमिरे, साहित्य संगम मकवानपुरका सल्लाहकार आरसी रिजाल, सर्जक सञ्जाल मकवानपुरका संयोजक निमेष निखिल, कवि तथा साहित्यकार, पत्रकार, विद्यार्थी, र स्थानीय युवाहरूको उल्लेखनीय उपस्थिति रहेको थियो।

प्रदेश युवा परिषद्का कार्यकारी उपाध्यक्ष सन्तोष चौलागाईंले युवा कविता उत्सवलाई निरन्तरता दिँदै यसलाई अझ सशक्त रूपमा अगाडि बढाइने बताए। उनले भने, “युवाहरूको साहित्यिक चेतना र सृजनात्मक क्षमतालाई देश निर्माणमा प्रयोग गर्न यस प्रकारका कार्यक्रमले महत्त्वपूर्ण योगदान पुर्‍याउँछ।”

राष्ट्रिय युवा कविता उत्सवले देशभरका युवा प्रतिभाहरूलाई आफ्नो सृजनशीलता प्रदर्शन गर्ने उत्कृष्ट मंच प्रदान गरेको छ। कार्यक्रममा सहभागी युवाहरूले आफ्नो भावना, पीडा, प्रेम र देशप्रेमका कथा कवितामार्फत प्रस्तुत गर्दै साहित्यिक माहोललाई समृद्ध बनाएका छन्।
कार्यक्रमको अन्त्यमा विजेताहरूलाई पुरस्कार वितरण गर्दै अतिथिहरूले उनीहरूको उज्ज्वल भविष्यको कामना गरेका थिए। यस किसिमका कार्यक्रमले नेपाली साहित्यको उज्ज्वल भविष्यको बाटो कोर्ने विश्वास गरिएको छ।