मकवानपुरका एक प्रधानाध्यापक माथी सिन्धुलीमा गोली प्रहार
हेटौंडा । मकवानपुरको एक विद्यालयका प्रधाानाध्यापकलाई अज्ञात समूहले सिन्धुलीमा गोली प्रहार गरेको छ । मकवानपुरबाट सिन्धुलीतर्फ जाने क्रममा हरिहरपुरगढी गाउँपालिका–६ स्थित हप्सेमा मकवानपुरको बागमती गाउँपालिका–१ का प्रेमबहादुर बोम्जनमाथि गोली प्रहार भएको हो ।
गोली प्रहारबाट घाईते भएका बोम्जन बकैया गाउँपालिका–३ हातिसुँडेमा रहेको बुद्ध माध्यमिक विद्यालयका प्रधानाध्यापक हुन् । उनले अहिले वीरगन्जको वयोधा अस्पतालमा उपचार भईरहेको जिल्ला प्रहरी कार्यालय सिन्धुलीका डिएसपी अनिल खड्काले जानकारी दिए
गोली प्रहारबाट मोटरसाइकल चलाइरहेका बोम्जनले प्रयोग गरेको हेलमेटको दायाँ तर्फबाट गाला छेडिएको प्रहरीले जनाएको छ । गोली बोम्जनको दाँतमा अड्किएको डिएसपी खड्काको भनाई छ । गोली प्रहारबाट घाइते भएका बोम्जनको सर्लाहीस्थित मोडल अस्पतालमा सामान्य उपचार पश्चात् थप उपचारका लागि वीरगन्जको वयोधा अस्पताल पठाइएको खड्काले बताए । गोली प्रहार गरी फरार रहेका समूहको खोजीकार्य भइरहेको उनले बताए ।
तराई मूलका ३ जना अपरिचित व्यक्तिले बागमती गाउँपालिका–१ का प्रेमबहादुर बोम्जनमाथि गोली प्रहार गरेको प्रहरी कार्यालय सिन्धुलीले जनाएको छ । खड्काका अनुसार मकवानपुरबाट प्रदेश २–००३–००६ प ८४५४ नम्बरको मोटरसाइकलमा सिन्धुलीतर्फ जाँदै गरेको अवस्थामा बोम्जनमाथि गोली प्रहार भएको हो ।
उनका अनुसार ३ जनाको समूहमा आएका व्यक्तिले मोटरसाइकलमा सवार उनलाई रोकी छोटो हतियार (कट्टा) प्रहार गरेका थिए । गोली प्रहार गरेसँगै तीनै जना फरार रहेको खड्काले बताए । बोम्जनसँगै सवार रहेका उनका भाइ दिल बहादुर बोम्जन भने सकुशल रहेका छन् ।
