हेटाैँडामा खैरोहिरोइनसहित ४ जना पक्राउ
हेटौँडा । मकवानपुर प्रहरीले जिल्लाको छुट्टाछुट्टै दुई स्थानबाट अवैध लागूऔषध खैरोहिरोइनसहित ४ जनालाई पक्रेको छ ।
हेटौंडा १५ रातोमाटेबाट २ जना र हेटौंडा ११ थानाभर्याङबाट २ जना गरी ४ जनालाई पक्रेको हो । काँकडभिट्टाबाट हेटौंडातर्फ आउँदै गरेको बागमती प्रदेश ०१–००६ ख ७४४३ नम्बरको बसबाट २२२ ग्राम २६ मिलिग्राम खैरोहिरोइनसहित २ जना पक्राउ परेका छन् ।
पक्राउ पर्नेमा सुनसरीको बराहक्षेत्र नगरपालिका वडा नम्बर ७ बस्ने ४१ वर्षका दामोदर लुइटेल र १८ वर्षका सन्देशराज धामी रहेका छन् । शंकाको आधारमा उनीहरुलाई खानतलासी गर्दा २२२ ग्राम २६ मिलिग्राम खैरोहिरोइन फेला परेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालले जानकारी दिए । लुइटेल र धामीलाई जिल्ला अदालत मकवानपुरबाट १५ दिनको म्याद अनुमति लिएर आवश्यक अनुसन्धान प्रक्रिया अघि बढाइएको उनले बताए ।
यसैगरि प्रहरीले हेटौंडा–११ थानाभर्याङ नमूना टोलबाट खैरोहिरोइनसहित २ जनालाई पक्राउ गरेको छ । पक्राउ पर्नेमा हेटौंडा ११ का २३ वर्षीय सुजन गुरुङ र हेटौंडा १० का ३३ वर्षका अजय गहतराज रहेका छन् । रातको समयमा शंकास्पद अवस्थामा हिँडिरहेका उनीहरुको शरीर खानतलासीको क्रममा ४ ग्राम खैरोहिरोइन फेला परेको जिल्ला प्रहरी कार्यालय मकवानपुरका प्रवक्ता अर्यालले जानकारी दिए ।
उनीहरुको साथबाट ११ वटा रातो प्लाष्टिकको पुरियामा रहेको खैरोहेरोइन फेला परेको प्रहरीले जनाएको छ । लागूऔषधसहित पक्राउ परेका गुरुङ र गहतराजलाई जिल्ला अदालत मकवानपुरबाट ५ दिनको म्याद अनुमति लिएर थप अनुसन्धान प्रक्रिया अघि बढाइएको जिल्ला प्रहरी कार्यालय मकवानपुरले जनाएको छ ।
