मकवानपुरमा ट्रकबाट १७५ किलो गाँजा बरामद
हेटौंडा । मकवानपुरको भीमफेदी गाउँपालिका वडा नं.१ सामरी पुल नजिकैबाट लागुऔषध गाँजा सहित एक जना पक्राउ परेका छन् । पक्राउ पर्नेमा हेटौडा उपमहानगरपालिका वडा नं.४ बस्ने बर्ष ५१ को पुर्ण बहादुर रुम्बा रहेका छन् ।
बा.३ ख ४६१ नम्बरको मिनी ट्रकमा गाँजा लुकाई छिपाई ल्याएको छ भन्ने बिशेष सुचनाको आधारमा बागमती प्रदेश प्रहरी कार्यालय हेटौडा र जिल्ला प्रहरी कार्यालय मकवानपुरबाट खटिएको प्रहरी टोलीले ट्रक र ट्रक चालक रुम्बालाई नियन्त्रणमा लिएको हो ।
ट्रकलाई चेकजाँच गर्दा ट्रकको पछाडी पट्टी मुनी फल्स बटम बनाई लुकाई छिपाई राखेको अबस्थामा गाँजा १७५ किलो बरामद भएको जिल्ला प्रहरी कार्यालय मकवानपुरले जनाएको छ । सो बारे अनुसन्धान भइरहेको प्रहरीले जनाएको छ ।
