विश्वकप फुटबल २०२२ नोभेम्बर २१ देखि डिसेम्बर १८ सम्म
काठमाडौं । सन् २०२२ मा कतारमा हुने विश्वकप फुटबलको मिति सार्वजनिक भएको छ । विश्व फुटबलको सर्वोच्च निकाय फिफाले बुधबार दिएको जानकारी अनुसार विश्वकप फुटबल २०२२ नोभेम्बर २१ मा सुरु भएर डिसेम्बर १८ मा समापन हुनेछ ।
विश्वकपको उद्घाटन खेल ६० हजार दर्शक क्षमता रहेको अल बायत रंगशालामा हुनेछ । समूह चरणका खेलहरु चार फरक समयमा सुरु हुनेछन् । जसमा स्थानीय समयअनुसार दिउँसो एक बजे पहिलो खेल हुनेछ भने दिउँसो चार बजे दोस्रो, साँझ सात बजे तेस्रो तथा राति १० बजे चौथो खेल हुनेछ । यस्तै नकआउट चरणका खेलहरु साँझ ६ बजे र राति १० बजे हुनेछन ।
प्रतियोगिताको फाइनल खेल डिसेम्बर १८ मा ८० हजार दर्शक क्षमता रहेको लुसेल रंगशालामा हुनेछ । फाइनल खेल स्थानीय समयअनुसार साँझ ६ बजेदेखि सुरु हुनेछ ।
यसअघि जुन-जुलाईमा सञ्चालन हुँदै आएको विश्वकप यी महिनामा कतारमा अत्याधिक गर्मी हुने भएका कारण पहिलो पटक नोभेम्बर-डिसेम्बरमा गरिन लागेको हो ।
